सुख

सुखामागे धावताना
कधी मी माझा विचारच केला नाही
फक्त मला सुख हवयं ह्या विचारात
कधी सोनेरी क्षण हरवले कळलेच नाही
मला सर्व काही मिळत गेलं
पण सुखाची अनुभूती कधी झाली नाही
कधी मला सुख मिळेल
हाच सदा विचार केला
आयुष्याअखेरी मला सुखाचं रहस्य उमगलं
सुख म्हणजे नक्की काय असतं हे समजलं
सुख म्हणजे मनाचे समाधान
मानलं तर सुख नाहीतर सदा दुःखी..

एकटा

मी सदा एकटा असतो
माणसात असूनही वेगळा असतो
मी सदा एकटा असतो

मी फक्त माझ्यातच रमतो
माझ्या स्वतःच्या विश्वातच रमतो
मी सदा एकटा असतो

मला कुणाचीही साथ नको
मला कोणी सोबत नको
मी सदा एकटा असतो

मला फक्त मी आवडतो
माझ्यातला मी पणा आवडतो
मी सदा एकटा असतो

मला मित्र मैत्रीणी असंख्य असतात
मला शत्रूही खूपचं असतात
तरीही मी सदा एकटा असतो
तरीही मी सदा एकटा असतो

by  --- विनोद गोविंद

तूू अन् मी

मी तुझ्यासाठी समुद्र आहे.
माझ्याकडे प्रेमरुपी पाणी खूप आहे.
पण मी तुझी तहान भागवू शकत नाही.
तूला जे हवं आहे ते सर्वकाही मी देऊ शकतो
पण तुझी प्रेमाची तहान मी भागवू शकत नाही.
कारण मी समुद्र आहे खा-या पाण्याचा.

मी बाभळीचे झाड आहे.
माझ्याकडे प्रेमाची सावली आहे
पण त्या सावलीत तू येऊ शकत नाहीस.
कारण सावली काट्यांनी भरलेली आहे

                                                by विनोद गोविंद

निवडणूक स्पेशल

आले रे आले पुढारी आले
मतांची भीक मागायला आले

न केलेल्या कामांची जंत्री घेऊन
मतदारांच्या पायाशी लोळन घेऊन

तोंडात ठेवून साखरेचा दाणा
लाज सोडून सर्व जणा

नसलेली पुढे करती झोळी
म्हणे सर्वांना देऊ पोळी

महिना दोन महिने असेच चालेल
सारे पुढारी दारोदार भटकतील

कोणी दाखवेल ब्लू प्रिंट
कोणी आणेल व्हिजन डाॅक्युमेंट

काही म्हणतील केला आम्ही विकास
दाखवतील प्रगतीचा भास

दाखवतील अच्छे दिनाचे स्वप्न
आवळील राग विकासाचा सर्व सोडूनी

युत्या अन् आघाड्या करतील सारे
जागा वाटपासाठी भिडतील सारे

काही दिवस करतील तमाशा
निकालानंतर मतदाराला मारतीस तमाचा

आले रे आले पुढारी आले
मतांची भीक मागायला आले

by - विनोद गोविंद

मी या जगात नसेल तर..

मी या जगात नसेल तर..

सगेसोयरे अश्रृ ढाळतील काही काळ

मित्रही येतील सांत्वनासाठी

भडाग्नी दिल्यावर सर्वजण परतील

मी मात्र माझेच कलेवर जळताना पाहिल

आयुष्यभर शरीराला जाळत आलो

मेल्यावर फक्त राख झाली

जगताना नुसता धावत होतो

कशासाठी धावत होतो त्यास उत्तर नव्हतं

मरणानंतर माझ्याकडे वेळ आहे

एकप्रकारची शांती आहे

अगदी पिसासारखं हलकं वाटतयं

मी या जगात नसल्यावर मी मला भेटलो

                            by -- विनोद गोविंद

साजणा

जाऊ नको ना साजणा, शृंगार अर्धा सोडूनी

तुझ्या सोबतीची सवय साजणा, करते मला वेडावूनी

तू मला हवा हवासा वाटतो,  माझ्या मनाच्या जिवलगा
तुझा सहवास मला वेडावतो, माझ्या मनाच्या जिवलगा
तुझा स्पर्श हा साजणा, बेधुंद करतो सोडूनी
जाऊ नको ना..

तुझ्या बाहूपाशात मज घे ना, मनाच्या अगदी जवळी
तुझ्या नजरेत मज घे ना,  नयनांच्या अगदी जवळी
तुझ्या ओठांचा स्पर्श साजणा, कासावीस मज करूनी
जाऊ नको ना..

                             by --- विनोद गोविंद

मला एकदा मरून पहायचयं

मला एकदा मरून पहायचयं

मरणानंतरचं जग अनुभवायचयं

जगून थकलेल्या शरीराला 

मरणाच्या स्वाधीन करायचयं

मला एकदा..

म्हणतात मरण सगळे पाश सोडवतं

मला सर्व पाशातून मुक्त व्हायचयं

पाखरासारखं हलकं फुलकं व्हायचयं

मला एकदा..

सुख अन् दुःख या फे-यातल्या मला

कायमचं सोडवून टाकायचयं

सुख दुःख विरहित जग मला अनुभवायचयं

मला एकदा..

पाप अन् पुण्य याने घाबरलेल्या मनाला

मोकळा श्वास घेऊन द्यायचायं

एकदातरी निर्धास्त जगायचयं

मला एकदा..

                                 by -- विनोद गोविंद